Var með þrjú lítil börn laus í bílnum

Lögreglan á Suðurnesjum hafði um helgina afskipti af ökumanni sem var með þrjú lítil börn sín laus í bílnum. Börnin eru fjögurra, þriggja og tveggja ára. Ökumaðurinn var sjálfur ekki með öryggisbelti og gat ekki sýnt fram á að hann væri með ökuréttindi.

Þá stöðvaði lögreglan einnig pilt í umdæminu aðfaranótt sunnudags þar sem hann reyndist aka bifreið sem hann hafði stolið. Pilturinn er einungis sextán ára og hafði því ekki ökuréttindi.

Auk þess var rökstuddur grunur um að hann væri undir áhrifum fíkniefna við aksturinn. Var pilturinn færður á lögreglustöð og barnaverndaryfirvöldum tilkynnt um málið.