Stærsti skósamningur í sögu NFL-deildarinnar

NFL-stjarnan Odell Beckham Jr., leikmaður NY Giants, skrifaði undir risasamning við Nike í gær.

Samningur hans við Nike var útrunninn og munaði minnstu að Adidas næði að stela þessari risastjörnu. Nike galopnaði þó veskið á lokasprettinum og hélt útherjanum.

Beckham mun fá 25 milljónir dolllara fyrir fimm ára samning. Það eru litlir 2,5 milljarðar króna.

Þetta er helmingi hærri upphæð en nokkur annar leikmaður deildarinnar hefur fengið. Það segir ansi margt um vinsældir Beckham.

Í raun fær hann meira greitt frá Nike núna en frá Giants en þar er hann að fá 10,4 milljónir dollara, rúmur milljarður króna, fyrir fjögurra ára samning.