Svona kusu Íslendingar

Portúgal sigraði Söngvakeppni evrópskra sjónvarpsstöðva í kvöld. Salvador Sobral heillaði okkur Íslendinga upp úr skónum en Portúgalir fengu 12 stig í sinn hlut, bæði úr íslensku símakosningunni og frá íslensku dómnefndinni.

Þjóðin gaf svo Belgíu 10 stig, Svíþjóð 8 stig, Ítalíu 7 stig, Moldavíu 6 stig, Rúmeníu 5 stig, Búlgaríu 4 stig, Póllandi 3 stig, Ungverjalandi 2 stig og Noregi 1 stig.

Í íslensku dómnefndinni sátu þau Helga Möller, Pétur Örn Guðmundsson, Stefanía Svavarsdóttir, Kristján Viðar Haraldsson og Hildur Guðný Þórhallsdóttir. Stig nefndarinnar, sem Björgvin Halldórsson kynnti við góðan orðstír, röðuðust á þá leið að Ástralía fékk 10 stig, Svíþjóð 8 stig, Bretlandi 7 stig, Búlgaría 6 stig, Ítalía 5 stig, Ungverjaland 4 stig, Danmörk 3 stig, Belgía 2 stig og Noregur 1 stig.

Þannig er ljóst að dómnefnd var ívið hrifnari af framlögum Ástrala og Bretlands, sem komust ekki á blað í símakosningu, en almenningur. Þá var íslenska þjóðin meira fyrir Belgíu, Moldavíu og Rúmeníu en fagmennirnir.