Bað stjúpdóttur sína og vinkonu hennar um að sýna á sér brjóstin

Héraðsdómur Vestfjarða hefur dæmt 48 ára gamlan karlmann í níu mánaða fangelsi fyrir kynferðisbrot og brot gegn barnaverndarlögum þegar hann í apríl 2014 bað stjúpdóttur sína og vinkonu hennar um að sýna á sér brjóstin þegar hann tók mynd af þeim þar sem þær í heitum potti fyrir utan heimili þeirra og klæddar í bikiní.

Þá var maðurinn jafnframt dæmdur fyrir líkamsárás gegn þáverandi unnustu sinni, og móður stúlkunnar sem hann braut gegn, í nóvember 2015 auk þess sem hann var dæmdur fyrir umferðarlagabrot. Hann játaði bæði þau brot en neitaði kynferðisbrotinu og því að hafa brotið gegn barnaverndarlögum.

Hjá lögreglu lýsti stjúpdóttir mannsins því þannig að hún hefði verið í heitum potti með vinkonu sinni þegar hann hefði staðið á svölunum og ætlað að taka af þeim mynd. Hafi „hann beðið þær um að „fara upp“ þannig að brjóstin á þeim sæjust á myndinni.



Vandræðalegt og óþægilegt

Maðurinn hafi einnig sagt að þær ættu að gera það af því að brjóstin á þeim væru flott. Ákærði hafi verið að drekka þegar þetta gerðist og hafi henni fundist þetta mjög óþægilegt.“ Vinkona stúlkunnar bar á sama veg um atvikið og sagði að sér hefði fundist þetta bæði óþægilegt og vandræðalegt.

Þegar maðurinn gaf svo skýrslu hjá lögreglu kvaðst hann ekki kannast við að hafa sagt stúlkunum að kreista brjóstin út og „fara upp“ svo þau sæjust en hafi hann gert það þá hafi það verið sagt í gríni. Fyrir dómi neitaði hann svo staðfastlega að hafa sagt þetta við stúlkurnar.

Kvaðst hann aldrei hafa beðið stúlkurnar um að bera á sér brjóstin og að það væri fráleitt að þetta hafi verið eitthvað kynferðislegt. Hann hefði tekið af þeim myndir og beðið þær um að reisa sig við svo það sæist betur í þær. Svo segir í dómi héraðsdóms:



Framburður mannsins metinn óstöðugur

„Borinn var undir ákærða framburður hans hjá lögreglu, þar sem hann var spurður hvort hann hafi beðið þær um að sýna brjóst sín og hafi svarað að vel geti verið að hann hafi gert það, og kvaðst hann ekki þræta fyrir það en það hafi ekki verið í þeim skilningi að hafa beðið þær um að sýna ber brjóst. Um þennan framburð sagði ákærði að það gæti verið að hann hafi beðið þær um þetta ef þær eru alveg harðar á því að svo hafi verið.

Þá var ákærða kynntur framburður stúlknanna hjá lögreglu og kvaðst hann ekki vilja tjá sig um hann. Ákærði kvaðst ekki hafa orðið var við að tíminn hafi verið rangur í þeim síma sem notaður var við myndatökuna. Þá minntist hann þess ekki að hafa sagt eitthvað annað við stúlkurnar, ekki beðið þær um að bera aðra líkamshluta, né reynt að snerta þær eða muna eftir frekari afskipum af þeim þetta kvöld. Þá kvaðst hann halda að hann hafi aldrei sagt við þær að brjóstin á þeim væru flott eða beðið þær um að kreista fram brjóstin.“

Dómurinn mat það sem svo að ekkert hefði komið fram við meðferð málsins sem rýrði framburð stúlknanna. Hins vegar væri framburður mannsins óstöðugur og ekki væri hægt að byggja niðurstöðu málsins á honum. Því var hann dæmdur sekur en í dómnum segir að ekki hafi verið unnt að skilorðsbinda refsinguna þar sem maðurinn á langan sakarferil að baki sem nær aftur til ársins 1993.

Dóm héraðsdóms má sjá hér.