Lögreglan með sérstakt eftirlit með nagladekkjum

Lögreglan á höfuðborgarsvæðinu mun næstkomandi mánudag, þann 8. maí, byrja að fylgjast með notkun nagladekkja og sekta þá sem ekki hafa skipt yfir í naglalaus dekk.

Í tilkynningu frá lögreglunni segir að nagladekk séu nú farin að vera óþarfur búnaður á höfuðborgarsvæðinu þar sem sumarið sé farið að gera vart við sig.

Þá er minnt á að nú beri að greiða fimm þúsund króna sekt fyrir hvert nagladekk „og raunar sömuleiðis fyrir hvern óhæfan hjólbarða eins og það er orðað í reglugerð um sektir vegna brota á umferðarlögum.

Ökumenn, sem þess þurfa, eru því hvattir til að gera viðeigandi ráðstafanir og skipta út nagladekkjum ökutækja sinna til að forðast óþarfa kostnað vegna sekta. Þar að auki felst í því yndisauki að losna við glamrið sem fylgir nagladekkjum.“