126 börn skráð sem brotaþolar hjá lögreglunni

Málum, þar sem grunur er á að brotið sé gegn börnum, hefur fjölgað mikið hjá lögreglunni á höfuðborgarsvæðinu síðustu ár. Frá árinu 2015 til dagsins í dag eru 126 börn skráð sem brotaþolar. Aðallögfræðingur lögreglunnar segir margt hafa áhrif á þróunina, meðal annars vitundarvakningu í samfélaginu.

Ofbeldi foreldra gegn börnum þrífst á Íslandi en í 9 prósent heimilisofbeldismála á skrá hjá lögreglunni í fyrra var um að ræða ofbeldi gegn börnum. Frá miðjum janúar árið 2015 til dagsins í dag eru 126 börn skráð sem brotaþolar hjá lögreglunni á höfuðborgarsvæðinu og voru börnin ólögráða í tæplega 7 prósent málanna.

í 98 grein barnaverndarlaga segir að ef þeir sem hafa barn í sinni umsjá misþyrma því andlega eða líkamlega, misbjóða því kynferðislega eða á annan hátt, vanrækja það andlega eða líkamlega þannig að lífi eða heilsu þess er hætta búin þá varðar það fangelsi allt að fimm árum. Í 99 grein segir að hver sem beitir barn andlegum eða líkamlegum refsingum, hótunum eða ógnum eða sýnir af sér aðra vanvirðandi háttsemi gagnvart barni skuli sæta sektum eða fangelsi allt að þremur árum. Málum þar sem grunur er á að brotið sé gegn þessum greinum laganna hefur fjölgað mikið hjá lögreglunni eins og sést hér. Hjá Lögreglunni á höfuðborgarsvæðinu voru málin 26 árið 2014 og 56 árið 2015. Í fyrra voru málin hins vegar orðin 103. Það sem af er ári eru málin nú þegar 47. Þróunin er svipuð hjá öðrum embættum.

Alda Hrönn Jóhannesdóttir, aðallögfræðingur hjá Lögreglunni á höfuðborgarsvæðinu, segir ástæðurnar margþættar. Meðal annars hafi verklag lögreglunnar í heimilisofbeldismálum áhrif á fjölda tilkynninga. Í stuttu máli gengur verklagið út á það að lögregla, barnaverndar- og félagsmálayfirvöld komi að málunum strax í upphafi, afli eins mikilla upplýsinga og unnt er, bjóði stuðning og kynni brotaþolum þau úrræði sem í boði eru.

Alda segir að tilkynningar í málunum berist með ýmsum hætti; frá brotaþolunum sjálfum, fjölskyldumeðlimum, nágrönnum eða frá barnavernd.