Flugfélag Íslands losar sig við alla Fokkerana

Flugfélag Íslands hefur skrifað undir samninga við kanadíska fyrirtækið Avmax um sölu á fjórum Fokker 50 vélum félagsins, varahreyfli og varahlutum tengdum Fokker vélunum.

Þetta kemur fram í tilkynningu frá félaginu en með samningunum lýkur sögu Fokker 50 véla í eigu Flugfélags Íslands. Vélarnar hafa verið hjá félaginu frá 1992 og fyrirrennarar þeirra, Fokker 27 frá því árið 1965.

„Í tengslum við þessa sölu kaupir Flugfélag Íslands eina Bombardier Q200, 37 sæta vél af Avmax en fyrir er félagið með tvær slíkar vélar í rekstri. Gert er ráð fyrir að Q200 vélin komi í rekstur félagsins um næstu áramót en afhending Fokker 50 vélanna mun fara fram á næstu vikum.

Í kjölfar breytinga á flugflota félagsins á síðasta ári þegar 3 Bombardier Q400  72-76 sæta vélar voru teknar í notkun urðu miklar breytingar á rekstri félagsins. Nýjum áfangastöðum hefur verið bætt við leiðarkerfi félagsins, flug til Aberdeen í Skotlandi frá Keflavík hófst í mars 2016, flug til Kangerlussuaq á Grænlandi hófst í júní síðastliðnum og í febrúar á þessu ári hófst heilsársflug milli Keflavíkur og Akureyrar. Í júní næstkomandi mun síðan hefjast flug frá Keflavík til Belfast á Norður-Írlandi,“ segir í tilkynningu.

Haft er eftir Árna Gunnarssyni, framkvæmdastjóra Flugfélags Íslands, að með samningunum sé þeirri endurnýjun lokið sem lagt var upp með í flugflota félagsins og það sé mjög mikilvægur áfangi í því að efla félagið til frekari vaxtar. „Með því að bæta einni Bombardier Q200 vél í rekstur félagsins mun sveigjanleiki félagsins aukast og ný tækifæri skapast til að efla leiðarkerfið enn frekar“ segir Árni.