Tíu ár í dag frá einni mikilvægustu körfu KR í körfuboltanum | Myndband

„Brynjar, þristur, Brynjar, Brynjar, þristur,“ heyrist oft sungið af stuðningsmönnum KR og ekki af ástæðulausu. Brynjar Þór Björnsson, fyrirliði KR-liðsins í dag, hefur skorað ófáar þriggja stiga körfurnar í gegnum tíðina og fyrir nákvæmlega tíu árum síðan þá skoraði hann eina mikilvægustu körfuna í sögu körfuboltans í KR.

5. apríl 2007 tryggði Brynjar KR-liðinu nefnilega framlengingu í oddaleik á móti Snæfelli þegar liðin voru að spila um sæti í úrslitaeinvíginu um titilinn. Brynjar jafnaði metin í 68-68 og KR vann síðan 76-74 eftir framlengingu.

Brynjar var þarna átján ára gamall en hann skoraði alls tíu stig og þrjá þrista í leiknum. Stigin og þriggja stiga körfurnar hans hafa síðan verið áberandi í sigurgöngu KR-liðsins í körfuboltanum.

KR fór í úrslitaeinvígið 2007 þar sem liðið vann 3-1 sigur á Njarðvík. Þetta var fyrsti Íslandsmeistaratitill Brynjars með KR en nú tíu árum síðar eru þeir orðnir sex.

Brynjar fær ennfremur gott tækifæri til að bæta sjöunda Íslandsmeistaratitlinum við í úrslitakeppninni í ár og hann er ekki enn búinn að halda upp á 29 ára afmælisdaginn sem rennur ekki upp fyrr en í sumar.

Það er rétt hægt að ímynda sér hvað hefði gerst fyrir KR-liðið hefði það misst af Íslandsmeistaratitlinum 2007.  Það má því líta á þessa þriggja stiga körfu sem upphafi af ótrúlegri sigurgöngu KR-liðsins.

Það eru margir aðrir leikmenn og margar aðrar stórar körfur sem eiga líka sinn sess á þessum ótrúlegu og sigursælu árum í Vesturbænum. Karfan hans Brynjars gleymist samt seint aldrei og það er svolítið skrýtið að það séu liðinu tíu ár frá þessu eftirminnilega skírdagskvöldi í DHL-höllinni.

Þriðji leikur KR og Keflavíkur í undanúrslitum Domino´s deildar karla verður á föstudaginn og að sjálfsögðu í beinni útsendingu á Stöð 2 Sport. Staðan er 1-1 eftir sigur Keflvíkinga í síðasta leik.