Top Reiter með yfirburði

Jakob Svavar Sigurðsson átti góðu gengi að fagna á lokakvöldi Meistaradeildar Cintamani í hestaíþróttum í gærkvöldi, en keppt var í tölti og flugskeiði í Samskipahöllinni í Kópavogi. Úrvalshryssa hans, Gloría frá Skúfslæk, var af mörgum álitin betri en nokkru sinni fyrr og hlaut Jakob Svavar annað sætið í tölti eftir frábæra sýningu.

Jakob Svavar var efstur að stigum í einstaklingskeppninni fyrir lokakvöldið og hlaut 10 stig fyrir árangur sinn í töltkeppninni. Hann fór hins vegar stigalaus út úr keppninni í flugskeiði og þurfti því að eftirláta tvö efstu sætin öðrum knöpum, þeim Bergi Jónssyni og Árna Birni Pálssyni, en sjálfur hafnaði hann í þriðja sæti.

Keppnisárið byrjar þó með stæl hjá Jakobi Svavari og Gloríu, en hann stefnir með hana á úrtöku fyrir heimsmeistaramót í hestaíþróttum sem fer fram í Hollandi í ágúst. Ekki var síðra árangur liðs Jakobs Svavars, Top Reiter, en það varð stigahæst í liðakeppninni með 439.5 stig og hafði þó nokkra yfirburði.

Sýnt var frá Meistaradeild Cintamani í beinni útsendingu á Stöð 2 sport og má sjá valin augnablik frá lokakvöldinu á meðfylgjandi myndskeiði.

Niðurstöður A-úrslita í tölti voru eftirfarandi:

1 Bergur Jónsson Katla frá Ketilsstöðum                              8.83

2 Jakob Svavar Sigurðsson Gloría frá Skúfslæk                     8.78

3 Guðmundur Friðrik Björgvinsson Straumur frá Feti           8.61

4 Ásmundur Ernir Snorrason Spölur frá Njarðvík                  8.39

5 Árni Björn Pálsson Skíma frá Kvistum                                8.28

6 Viðar Ingólfsson Pixi frá Mið-Fossum                                7.89

Einstaklingskeppni Meistaradeildar í hestaíþróttum 2017

1. Bergur Jónsson        45 stig

2. Árni Björn Pálsson      45 stig

3. Jakob S. Sigurðsson   43.5 stig

Liðakeppni Meistaradeildar í hestaíþróttum 2017

1. Top Reiter 439.5 stig

2. Hestvit / Árbakki / Svarthöfði 367.5 stig

3. Gangmyllan 351 stig