Kenndi NFL-deildinni um þar sem hann kunni ekki stafrófið

Lögreglumenn víða um heim hafa lent í ýmsu er þeir stöðva ökumenn sem þeir gruna um að aka ölvaðir. Lögreglumenn í Texas fengu að upplifa eitthvað alveg nýtt er þeir stöðvuðu fyrrum hlaupara úr NFL-deildinni.

Sá heitir Cedric Benson og lék með Chicago Bears, Cincinnati Bengals og Green Bay Packers á átta ára ferli í NFL-deildinni. Hann var valinn númer fjögur í nýliðavalinu árið 2005.

Benson var stöðvaður fyrir utan 7-Eleven í Austin þar sem aksturslag hans hafði þótt sérstakt.

Þá neitar Benson því að sitja inn í bílnum er lögreglan kemur að honum. Segist þurfa að fara inn í búð að versla.

Lögreglumenn sögðu það vera augljóst mál að Benson væri kenndur. Göngulagið var ekki beint, kaupstaðarlyktin sveif yfir lögreglumennina og ökumaðurinn gat ekki hætt að tala. Hann var þess utan ósamstarfsfús og góður með sig.

Venjan er að lögreglan leggi próf fyrir þá sem þeir stöðva og þegar kom að því að fara með stafrófið þá neitaði Benson því.

„Ég get ekki farið með stafrófið því ég var í átta ár í NFL-deildinni,“ var afsökun leikmannsins fyrir því að kunna ekki stafrófið.

Þess utan sagðist Benson ekki geta talið lengra en upp í þrjú. Augljóslega bláedrú.

Þetta er ekki í fyrsta skipti sem þessi fyrrum NFL-stjarna kemst í kast við lögin. Hann hefur meðal annars verið handtekinn fyrir að ganga á skrokk á fjölskyldumeðlimi.

Hann var svo rekinn frá Bears árið 2008 fyrir að bæði aka og sigla fullur.