Ívari finnst umfjöllunin um skíðaferðina ósanngjörn: Eins og ég sé glæpamaður að flýja afbrot

Ívar Ásgrímsson, þjálfari Hauka, skrifar í kvöld pistil á Facebook-síðu sína þar sem hann gagnrýnir þá umfjöllun sem skíðaferð hann er í erlendis hefur fengið á fjölmiðlum undanfarna daga.

Eins og Vísir fjallaði um fyrir helgi fór Ívar í skíðaferð með fjölskyldunni um helgina en tímasetningin á ferðinni vekur athygli þar sem Haukar eiga framundan virkilega mikilvægan leik gegn Snæfelli í Dominos-deild karla.

Ívar staðfestir það í pistlinum að hann verði ekki með liðinu á föstudaginn og að hann sé erlendis á skíðum.

Sjá einnig:Óvíst hvort Ívar stýrir Haukum gegn Snæfelli vegna skíðaferðar

Gæti farið svo að þessi leikur skeri út um hvort liðið haldi sæti sínu í deild þeirra bestu á næsta tímabili en Haukar einfaldlega verða að vinna þennan leik.

Sérfræðingar Körfuboltakvölds voru einróma sammála um að þessi tímasetning væri afar sérkennileg og furðuðu sig á að þjálfari myndi taka svona ákvörðun en þá umræðu má sjá hér.

Sjá einnig: Körfuboltakvöld: Framlengingin | „Þetta er gjörsamlega galin ákvörðun hjá Ívari“



Ívar svarar fyrir þetta í pistlinum þar sem hann segist hafa pantað þessa ferð síðasta sumar þar sem hann myndi aðeins missa af einum heimaleik sem væri ekki í úrslitakeppni né á bikarhelgi en leikurinn sé mun mikilvægari en búist var við.

Segir hann einnig að leikmenn hafi vitað af þessu og að liðið sé í góðum höndum hjá aðstoðarþjálfurum liðsins en að allt sé rétt upp sett og hann sé viss um að leikmenn komi af fullum krafti inn í leikinn og vinni.

Segist hann vera að fara í ferð sem sé búin að vera í áætlun undanfarin ár en aldrei gefist tími í fyrr en ákveðið var að kaupa ferðina. Öll frí undanfarna áratugi hafi verið skipulögð í kringum körfuboltann og loksins þegar hann láti persónulega hagsmuni ganga fyrir sé það stórmál.

Sakar hann Körfuboltakvöld um að blása upp umræðuna og eyða heilum þætti til umfjöllunar um þetta atvik og honum sé gert að líða eins og glæpamanni sem sé að flýja eitthvað afbrot sem hann hefur gert af sér.