Fjórir NFL-leikir í London á næsta ári

NFL-deildin er búin að ákveða hvaða leikir í deildinni fara fram í London á næsta tímabili. Ekki er ráð nema í tíma sé tekið.

Leikirnir fara fram á tímabilinu 24. september til 29. október og verður bæði spilað á Wembley sem og á Twickenham-vellinum.

Spilað var á Twickenham í fyrsta skipti í ár og þótti það heppnast vel. Verða því tveir leikir þar núna og tveir á Wembley.

Það voru þrír leikir í NFL-deildinni í London í ár og þessir fjórir leikir er því það mesta sem boðið hefur verið upp á í London.

Leikir á Wembley:

Jacksonville Jaguars - Baltimore Ravens

Miami Dolphins - New Orleans Saints

Leikir á Twickenham:

Cleveland Browns - Minnesota Vikings

Los Angeles Rams - Arizona Cardinals