Erfitt fyrir Helenu að horfa á íslenska liðið tapa út í Slóvakíu

Helena Sverrisdóttir var mætt á æfingu hjá íslenska kvennalandsliðinu í körfubolta í gær en hún á von á barni og getur ekki hjálpað liðinu inn á vellinum í kvöld þegar stelpurnar mæta Portúgal í Laugardalshöllinni.

Helena er jafnan fyrirliði íslenska liðsins og atkvæðamest bæði í stigaskori og að skapa skotfæri fyrir liðsfélagana. Hennar er því sárt saknað í þessum leikjum.

Leikur Íslands og Portúgals verður úrslitaleikur um þriðja sæti riðilsins en hvorugt liðið á möguleika á því að komast áfram.

„Ég held að stelpurnar séu tilbúnar að spila aftur eftir úrslitin úr síðasta leik. Ég man lítið eftir Portúgalsleiknum úti nema að við vorum hundfúlar með hvað við vorum lélegar í þeim  leik. Núna er tækifæri til að laga það,“ segir Helena.

Íslenska liðið lék á laugardaginn sinn fyrsta keppnisleik án Helenu í tólf ár og hún viðurkennir að það hafi verið erfitt að horfa á stelpurnar tapa með 46 stigum úti í Slóvakíu.

„Það var mjög erfitt að vera að horfa á þetta og hvað þá þegar það gekk svona illa. Mig langaði svo að fara inná og reyna að hjálpa eitthvað til. Þetta er ungur hópur og vonandi lærum við af þessu. Það er leiðinlegt þegar það koma svona stórar tölur en það gerist bara stundum,“ segir Helena.

Helena og stelpurnar unnu eftirminnilegan sigur á Ungverjum í síðasta heimaleik sínum í keppninni en sá leikur var í febrúar síðastliðnum. Liðið þarf annan stórleik til að landa sigri annað kvöld.  

„Sá leikur var geðveikur og allt liðið spilaði ótrúlega vel saman í þeim leik. Vonandi tekst þeim að fara í svoleiðis gír á morgun (í dag) ,“ segir Helena. Það má sjá fréttina úr kvöldfréttum Stöðvar 2 í spilaranum hér fyrir ofan.

Leikur Ísland og Portúgals hefst klukkan 19.30 í Laugardalshöllinni í kvöld.