Atkinson snýr aftur á miðvikudaginn

Jeremy Atkinson verður með Njarðvík í leiknum gegn Haukum á miðvikudagskvöldið. Þetta kemur fram á Facebook-síðu körfuknattleiksdeildar Njarðvíkur.

Atkinson lék með Njarðvík síðari hluta síðasta tímabils og hahn snýr því aftur í græna búninginn.

Njarðvíkingar hafa verið í miklum vandræðum inni í teig á tímabilinu og eftir sex umferðir hefur aðeins botnlið Snæfells tekið færri fráköst að meðaltali í leik en Njarðvík.

Miðherjinn Corbin Jackson þótti ekki standa undir væntingum og var sendur heim eftir fjóra leiki og Atkinson er ætlað að fylla hans skarð.

Atkinson lék 19 leiki með Njarðvík í fyrra. Hann var með 19,6 stig, 10,0 fráköst og 3,3 stoðsendingar að meðatali í leik.

Atkinson, sem verður 26 ára síðar í mánuðinum, lék áður með Stjörnunni, síðari hluta tímabilsins 2014-15.

Njarðvík er með fjögur stig í 9. sæti Domino's deildarinnar.