Umfjöllun og viðtöl: ÍR - KR 69-96 | Auðvelt hjá KR

Deildarmeistarar KR enduðu deildarkeppnina með stæl í Breiðholtinu í kvöld.

Fyrir leikinn var allt ráðið hjá þessum liðum. KR hafði tryggt sér deildarmeistaratitilinn á meðan ÍR-ingar voru á leið í sumarfrí. Eitthvað sem menn kannast vel við á þessum árstíma í Breiðholtinu.

KR-ingar áttu ekki í vandræðum í kvöld. Byrjuðu af miklum krafti. Það kom smá bakslag í 1. leikhluta og ÍR náði skyndilega forystunni en það var lagað með einu léttu leikhléi.

Sigur KR var aldrei í hættu. Maður leiksins var augljóslega Michael Craion með 32 stig og 9 fráköst. Hann var sjóðheitur og ÍR-ingar áttu engin svör. Craion fékk svo að hvíla fjórða leikhlutann og horfa á frá bekknum.

Meira er varla um þennan leik að segja. Grindavík verður fyrsti mótherji KR í úrslitakeppninni.

ÍR-KR 69-96 (17-23, 20-25, 16-32, 16-16)

ÍR: Sveinbjörn Claessen 11/8 fráköst, Sæþór Elmar Kristjánsson 10, Björgvin Hafþór Ríkharðsson 8, Kristján Pétur Andrésson 7, Vilhjálmur Theodór Jónsson 7/6 fráköst, Hákon Örn Hjálmarsson 6, Trausti Eiríksson 6/9 fráköst, Eyjólfur Ásberg Halldórsson 4, Daði Berg Grétarsson 4, Sigurkarl Róbert Jóhannesson 4, Kristófer Fannar Stefánsson 2, Haraldur Bjarni Davíðsson 0.

KR: Michael Craion 32/9 fráköst, Snorri Hrafnkelsson 12, Darri Hilmarsson 11/8 fráköst, Björn Kristjánsson 10, Helgi Már Magnússon 8, Brynjar Þór Björnsson 8/4 fráköst, Pavel Ermolinskij 8/11 fráköst/9 stoðsendingar, Þórir Guðmundur Þorbjarnarsson 2/4 fráköst, Ólafur Þorri Sigurjónsson 2, Andrés Ísak Hlynsson 2, Vilhjálmur Kári Jensson 1, Arnór Hermannsson 0.

Borche vill vera áfram

Þjálfarinn Borche Ilievski Sansa er með áframhaldandi samning við ÍR og allt stefnir í að hann verði áfram með liðið.

Hann sagði við Vísi að hann væri orðinn Breiðhyltingur og býr rétt hjá íþróttahúsinu í Seljaskóla. Eins og venja er þarf að ræða við stjórnina eftir tímabilið, þannig sé jú starf þjálfarans, en hans vilji er skýr: Hann vill halda áfram sínu starfi hjá ÍR.

Finnur Freyr: Grindvíkingar verða skeinuhættir

„Við höfum verið smá loftlausir eftir sigurinn gegn Keflavík. Síðustu leikir hafa verið frekar daprir en þetta var gott í dag," sagði Finnur Freyr Stefánsson, þjálfari KR.

„Við gerðum vel í að nýta Craion og hann gerði vel hérna í kvöld. Mikil orka í honum. Flottur."

„Þetta er ein keppni. Þetta er keppni sem okkur er annt um, hún sýnir að við höfum verið bestir yfir allt tímabilið. Liðin hafa átt sýna góðu kafla og slæmu en við höfum sýnt stöðugleika allt tímabilið. Ég er gríðarleg ánægður með þetta."

„Grindavík er með hörkumannskap sem hefur ekki sýnt sitt rétta andlit í allan vetur. Þeir verða skeinuhættir og eru góðir. Við erum ekki að fara í neitt auðvelt."

Brynjar Þór: Klárum Grindavík vonandi 3-0

„Það er alltaf gaman að vinna titil. Sérstaklega þrisvar í röð," sagði Brynjar Þór Björnsson, leikmaður KR.

„Mætur maður sagði við mig fyrir mörgum árum síðan að deildarmeistaratitillinn væri erfiðasti titillinn að vinna. Það er frábært að hafa unnið hann þrjú ár. Þú þarft að halda dampi í sex mánuði til að vinna þennan titil.“

„Við þurfum að fara til Grindavíkur og sækja sigur þar. Vonandi klárum við þetta 3-0"

Tweets by @Visirkarfa3