Inn- og útflutningur gæti stöðvast

Allur inn- og útflutningur til og frá landinu stöðvast uppúr helginni náist ekki samningar við yfirmenn á farskipum fyrir þann tíma. Kjaradeila þeirra er í algjörum hnút eftir árangurslausan samningafund í dag.

Félag vélstjóra og málmtæknimanna og Félag skipstjórnarmanna samþykktu bæði í byrjun mánaðarins að boða til verkfalls skipstjóra, stýrimanna og vélstjóra á kaupskipum í millilandasiglingum. Verkfallið skellur á miðnætti á mánudaginn ef ekki nást kjarasamningar fyrir þann tíma.

Verkfallið nær til fimm skipa Eimskips og tveggja skipa Samskipa. Fundað hefur verið stíft í kjaradeilu félaganna og Samtaka atvinnulífsins undanfarið. Í dag hittust svo samninganefndir vélstjóra og Samtaka atvinnulífsins í Karphúsinu. Fundurinn reyndist árangurslaus og var nýr ekki boðaður fyrr en á mánudaginn.

„Eins og hlutirnir eru að ganga núna þá gengur þetta mjög hægt og svo sem ekkert í kortunum sem að bendir til þess að annað en að þetta blessaða verkfall skelli á miðnætti 1. febrúar,“ segir Guðmundur Ragnarsson formaður Félags vélstjóra og málmtæknimanna.

Guðmundur segir mikið bera á milli deiluaðila og margra mánaða viðræður litlu hafa skilað. Hann segir verkfallið koma til með að hafa mikil áhrif þar sem allur inn- og útflutningur til og frá landinu stöðvast ef til þess kemur. „Ég held að áhrifin verði mjög fljót að segja til sín,“ segir Guðmundur Ragnarsson.