Nördavæðing NBA

Þegar gengið er um skrifstofur sögufræga félagsins Boston Celtcs sést skilti hanga á einni hurðinni merkt BIA. Skammstöfunin vísar til CIA, leyniþjónustu Bandaríkjanna, og þýðir skammstöfunin Basketball Intelligence Agency. Vissulega er skiltið sett upp með húmor í huga en þetta fangar samt sem áður hugarfarið í NBA-deild 21. aldarinnar. Fókusinn í NBA hefur að vissu leyti færst frá leikmönnunum inni á vellinum og yfir á hvaða upplýsingar skrifstofur félaganna í NBA-deildinni geta útvegað.

Markmið ráðamanna liðanna er að gera leikinn mælanlegan; að finna réttar breytur svo hægt sé að kortleggja leikfræðina og hegðun leikmanna á vísindalegan hátt.

Leikfræðinni breytt

Þessi bylting, ef svo má kalla, hófst fyrir um áratug og hefur haft mikil áhrif á spilamennsku margra liða í deildinni. Lið Houston Rockets hefur gengið lengst í þessari tölfræðivæðingu og liðið leitar nú aðeins að skotum mjög nálægt körfunni eða fyrir aftan þriggjastigalínuna. Auk þess hefur framkvæmdastjóri liðsins, Daryl Morey, öfluga sérfræðinga á sínum snærum sem greina leiki og leikmenn hinna liðanna ítarlega og eru leikmenn stundum fengnir til liðsins vegna þess að þeir uppfylla mjög afmörkuð skilyrði, skilgreind út frá tölfræðinni.

Ungir framkvæmdastjórar

Fleiri lið hafa fetað svipaðar leiðir og Rockets og hefur þessi vísindalegi þankagangur verið í stöðugri útbreiðslu. Oft eru fulltrúar þessarar byltingar af yngri kynslóðinni og má sjá hversu vel þessi vísindalega nálgun á leikinn er vinsæl með því að skoða aldur framkvæmdastjóra deildarinnar. Undanfarinn áratug hafa nokkrir verið ráðnir inn í þessar ábyrgðastöður, rétt um þrítugt.

Má þar nefna Sam Presti, framkvæmdastjóra Oklahoma City Thunder, sem náð hefur markverðum árangri. Hann var ráðinn 31 árs og var þá yngsti framkvæmdastjórinn í sögu NBA. Rob Hennigan, framkvæmdastjóri Orlando Magic, var ráðinn þrítugur og sló met Presti. Báðir nálgast starfið á nýstárlegan hátt, með tölfræðina að vopni.

Betri aðgangur að upplýsingum

Það eru ekki bara stjórnendur NBA-liðanna sem nýta tölfræðigögnin. Mikil þróun hefur verið í því hvernig blaðamenn fjalla um deildina. Ný kynslóð blaðamanna sem nýtir sér bættan aðgang að upplýsingum hefur rutt sér til rúms. Vefsíðan Grantland hefur til að mynda sérhæft sig í slíkri umfjöllun. Einn af föstum pennum síðunnar er til að mynda Kirk Goldsberry, landfræðingur og kortagerðamaður sem kennir við Harvard.

Goldsberry skrifaði doktorsritgerð um hvernig væri hægt að kortleggja umferð og hefur nýtt sérþekkingu sína í að setja fram gögn um hvar leikmenn skora með sem auðveldustum hætti og hefur með sérþekkingu á framsetningu gagna vakið mikla athygli.