Svandís segir Jónas sjálfan fara með fleipur

Svandís Svavarsdóttir, þingmaður Vinstri grænna, vísar ásökunum Jónasar Kristjánssonar ritstjóra um að þingmenn hafi með nýjum náttúruverndarlögum brotið þúsund ára hefð um réttarstöðu landeigenda og ferðamanna, alfarið á bug. Jónas vandaði þingheimi ekki kveðjurnar í bloggi sínu í gær og sakaði Svandísi um lygar.

Svandís segist ekki ætla að sitja undir slíkum ásökunum og segir Jónas þurfa að vanda sig betur. Hún biðst ekki afsökunar, líkt og Jónas fer fram á.

„Ákvæðið sem um er rætt er óbreytt frá lögunum 1999. Því hafði verið breytt í lögunum frá 2013 en það ákvæði tók því miður aldrei gildi. Auk þess var nú samþykkt bráðabirgðaákvæði um að ráðherra skuli sérstaklega fara yfir samspil almannaréttar, náttúruverndar og ferðaþjónustu og leggja mál fyrir þingið haustið 2017 þar um. Eins og allir vita er niðurstaðan málamiðlun þar sem enginn fékk allt sitt fram,“ skrifar Svandís á Facebook.

Þúsund ára vandaðri lagasátt frá Jónsbók sparkað til að efla völd landeigenda og ráðherra. VG og píratar sviku.

Posted by Jonas Kristjansson on 19. nóvember 2015

Umrædd lög voru samþykkt með öllum greiddum atkvæðum á Alþingi í síðustu viku, en fram að því hafði frumvarpinu ítrekað verið frestað. Líkt og Svandís nefnir voru náttúruverndarlög síðast samþykkt árið 2013, en tóku ekki gildi þar sem Sigurður Ingi Jóhannsson, þáverandi umhverfisráðherra, fór fram á að lögin yrðu endurskoðuð.

Færslu Svandísar má sjá hér fyrir neðan.

Jónas fer hér með fleipur og ásakar mig auk þess blákalt um lygar. Undir því get ég ekki setið. Ákvæðið sem um er rætt...

Posted by Svandís Svavarsdóttir on 20. nóvember 2015

Þá voru ný náttúruverndarlög rædd í Íslandi í dag á dögunum.