Vitni í Stím-málinu neitaði alfarið að tjá sig fyrir dómi

Elmar Svavarsson, sem var verðbréfamiðlari í Glitni fyrir hrun, var kallaður til sem vitni í Stím-málinu í Héraðsdómi Reykjavíkur í morgun.

Í málinu eru þeir Lárus Welding, fyrrverandi forstjóri Glitnis, Jóhannes Baldursson, fyrrverandi framkvæmdastjóri markaðsviðskipta bankans og Þorvaldur Lúðvík Sigurjónsson, fyrrverandi forstjóri Sögu Capital, ákærðir fyrir umboðssvik og hlutdeild í umboðssvikum vegna lánveitinga til félagsins Stím.

Skemmst er frá því að segja að Elmar neitaði alfarið að tjá sig fyrir dómi en þar sem hann er með réttarstöðu sakbornings í öðrum málum sem sérstakur saksóknari hefur til rannsóknar átti vitnið rétt á því að svara ekki spurningum þar sem svarið kynni að varpa á hann sök. 

Ráðlagt að svara engum spurningum

Þegar Elmar settist í vitnastúkuna sagði hann að lögfræðingur sinn hefði ráðlagt sér að svara engum spurningum þar sem Stím-málið væri beintengt fleiri málum, þar á meðal meintri markaðsmisnotkun í Glitni á nokkuð löngu tímabili fyrir hrun.

Símon Sigvaldason, dómsformaður, sagði þó að það yrði að „þreifa á þessu“ og leyfði saksóknara að spyrja Elmar. Hann lagði þó ríka áherslu á að það væru fyrst og fremst hagsmunir vitnisins sem væru undir vegna þeirrar stöðu sem hann hefði hvað varðar rannsókn annarra mála.

Saksóknari hóf þá að spyrja Elmar og bað hann að gera grein fyrir upphaflegri aðkomu sinni að málum FS37 og Stím. Elmar neitaði að svara þeirri spurningu og sagðist einfaldlega ekkert ætla að tjá sig. 

Sá ekki tilgang með því að spyrja vitnið áfram

Engu að síður hélt saksóknari áfram og spilaði meðal annars símtal á milli Elmars og Jakobs Valgeirs Flosasonar, sem var einn af eigendum Stím. Elmar var svo spurður hvort hann vildi tjá sig um þau samskipti en neitaði því og var augljóslega ekki skemmt. Hann beindi orðum sínum til dómsformannsins:

„Hann [saksóknarinn] er ekki að fara sérstaklega vel með hiemildina sem þú ert að veita honum.“

Sagði Símon þá að hann sæi ekki tilgang með því að spyrja vitnið áfram og lauk þar með skýrslutökunni.

Þess má geta að Elmar var einn af ákærðu í BK-málinu svokallaða og hlaut 5 ára fangelsisdóm í héraði vegna aðkomu sinnar að því. Þeim dómi var áfrýjað til Hæstaréttar sem tók málið fyrir fyrr í mánuðinum en enn er beðið niðurstöðu réttarins. Jóhannes Baldursson, einn sakborninga í Stím-málinu, var einnig dæmdur í 5 ára fangelsi í héraði vegna BK-málsins.