Rodgers stórkostlegur í öruggum sigri Green Bay Packers | Myndbönd

Aaron Rodgers og félagar í Green Bay Packers unnu sannfærandi 38-28 sigur á Kansas City Chiefs í lokaleik 3. umferð í NFL-deildinni á heimavelli í nótt.

Leikmenn Packers höfðu unnið báða leiki sína fram að leik gærdagsins en Kansas City Chiefs tapaði á útivelli gegn Denver Broncos í síðustu umferð eftir sigur á Houston Texans í fyrstu umferð.

Rodgers hóf leikinn með látum og kastaði fyrir tveimur snertimörkum strax í fyrsta leikhluta og alls þremur snertimörkum í fyrri hálfleik.

Gestirnir frá Kansas City Chiefs áttu í töluvert meiri vandræðum í sóknarleiknum en tókst að komast á blað með snertimarki frá Jamaal Charles í öðrum leikhluta en Green Bay Packers leiddi 24-7 í hálfleik.

Eftir sitt hvort snertimarkið í þriðja leikhluta reyndu leikmenn Kansas City að saxa á forskot heimamanna í fjórða leikhluta og hljóp Jamaal Charles tvisvar til viðbótar í markið fyrir snertimarki en vörn liðsins tókst ekki að stöðva Aaron Rodgers.

Green Bay Packers skoraði snertimark í fjórða leikhluta sem gerði út um leikinn. Átti Rodgers stutta sendingu á Randall Cobb sem skoraði snertimark, sitt þriðja í leiknum og fimmta snertimarkssending Rodgers í leiknum.

Green Bay hefur unnið fyrstu þrjá leiki tímabilsins en liðið mætir vængbrotnu liði San Fransisco 49ers á útivelli í næstu umferð á meðan leikmenn Kansas City Chiefs eiga fyrir höndum erfiðan leik gegn Cincinnatti Bengals.

Hægt er að sjá allt það helsta úr leiknum hér, bestu tilþrif Rodgers í leiknum hér og tilþrif Jamaal Charles hér.