Dagur ætlar að standa við stóru orðin: Leitar að leðurbuxum

„Loforð eru loforð og ég var að auglýsa eftir leðurbuxum í minni stærð á Twitter,“ segir borgarstjórinn Dagur B. Eggertsson hlæjandi. Hann segist treysta á deilihagkerfið og góðvild borgarbúa.

Dagur hét því á Twitter fyrr í kvöld að ef Måns Zelmerlöw stæði uppi sem sigurvegari í Eurovision myndi hann mæta í vinnuna í leðurbuxum. Það fór á endanum þannig að Zelmerlöw sigraði nokkuð örugglega.

En hvaða stærð af leðurbuxum er borgarstjórinn að leita? „Ég nota um það bil 33/33 eða 50, það er eftir því hvaða,“ svarar Dagur.

Ef einhver vill lána Degi leðurbuxur í þessari stærð er hægt að senda póst á ritstjorn@visir.is og við komum skilaboðunum áfram.

Auglýsi eftir leðurbuxum í stærð 33/33 eða 50. Til notkunar á þriðjudag. #12stig #deilihagkerfið #loforðeruloforð

— Dagur B. Eggertsson (@Dagurb) May 23, 2015