Fullkominn forsendubrestur í Úlfarsárdal

S. Björn Blöndal, formaður borgarráðs, segir að það eigi sér eðlilegar skýringar að framkvæmdir við uppbyggingu íþróttaaðstöðu í Úlfarsárdal hafi tekið lengri tíma en áætlað var í upphafi.

Ólafur Arnarson, formaður Fram, sagði við Fréttablaðið í vikunni að samkvæmt upphaflegum samningi félagsins við Reykjavíkurborg hefði staðið til að félagið væri alflutt úr Safamýri í Úlfarsárdal í lok þessa árs.

„Sá samningur var gerður árið 2008 og í október það ár gerast atburðir sem allir þekkja,“ sagði Björn og átti þar vitaskuld við efnahagshrunið. „Til þessa dags erum við enn að glíma við afleiðingarnar en meðal þess er að það varð fullkominn forsendubrestur fyrir uppbyggingu byggðar í Úlfarsárdal.“

Árið 2012 var ákveðið að setja áætlanir borgarinnar og Fram um uppbyggingu íþróttaaðstöðu í Úlfarsárdal til hliðar og hún sameinuð byggingu nýs grunnskóla, bókasafns, sundlaugar og menningarmiðstöðvar. Nú stendur yfir hönnunarsamkeppni um framkvæmdina sem áætlað er að ljúki í haust.

„Það er alveg ljóst að það ferli tekur tíma en niðurstaðan verður vonandi betri en hún hefði annars orðið,“ segir Björn en hann segist hafa skilning á því að það hafi reynt á biðlund íbúa Úlfarsárdals og Grafarholts.

„Það var ekki hægt að drífa í framkvæmdum og var alltaf ljóst að verkefnið þyrfti að fara í faglegt ferli – enda stærsta framkvæmd Reykjavíkur á næstu árum,“ segir Björn.

Áætlað er að framkvæmdin kosti 4-5 milljarða króna en Björn vonast til að fyrsta áfanga hennar verði lokið árið 2017.