Segir þær hafa áreitt sig eftir árásina: „Hausinn á mér var alltaf að dúndrast í vegginn“

Stúlkan sem ráðist var á inni á skemmtistaðnum Úrillu górillunni í Reykjavík í mars í fyrra bar vitni við aðalmeðferð málsins í Héraðsdómi Reykjavíkur í morgun. Stúlkan var á sautjánda ári þegar árásin átti sér stað en fjórar ungar konur eru ákærðar fyrir líkamsárásina. Þær gáfu einnig skýrslu í morgun.

„Ég var inni á klósetti að pissa og það var verið að berja og sparka á hurðina. Ég fór fram og þar mætti mér stelpa sem sagði að ef ég væri með einhverja stæla yrði ég barin. Ég lenti í átökum við nokkrar stelpur inni á klósettinu. Þær réðust nokkrar á mig og rifu í hárið á mér og voru að sparka í mig,“ sagði stúlkan fyrir dómi í dag.

Sjá einnig: Fullt af 95 módelum gerðu alvarlegri hluti

Hún sagðist svo muna eftir því að hafa verið á götunni fyrir utan staðinn og þá hafi verið sparkað og kýlt í hana. Jafnframt bar hún fyrir dómi að hún myndi eftir öllum ákærðu þar úti og að þær hefðu allar ráðist á sig.

Stúlkan mundi eftir andlitum þeirra frá því um kvöldið og lét lögregluna vita af því. Hún hafi síðan komist að því hvaða stelpur þetta væru, fundið þær á Facebook og þannig komist að því hvað þær hétu.

„Þær hafa áreitt mig töluvert eftir þetta og þetta hefur tekið virkilega á mig“

„Mér var hrint út í horn og að glugganum. Hausinn á mér var alltaf að dúndrast í vegginn. Ég fékk mörg hnefahögg á mig og nokkur höfuðhögg. Ég man ekki hver veitti mér þessa áverka. Ég reyndi alveg að halda fyrir andlit mitt og sló eitthvað frá mér. Ég var síðan bara dregin út úr hópnum eftir einhvern tíma.“

Hljóðhimna stúlkunnar sprakk í árásinni og bar hún fyrir dómi að hún hefði heyrt lítið í kjölfar árásarinnar. Þá var hún öll marin á líkamanum eftir árásina.

Stúlkan sagðist ekki muna eftir því hver hefði veitt henni höggið sem varð til þess að hljóðhimnan í henni sprakk. Spurð um ölvun sína umrætt kvöld sagðist stúlkan ekki hafa verið „svakalega full, bara venjulega.“

Stúlkan sagði fyrir dómi að hún væri nýbyrjuð hjá sálfræðingi. Hún segir að sér hafi liðið hræðilega eftir árásina en þær ákærðu í málinu þrýstu á hana að draga kæruna til baka.

„Mér leið hræðilega eftir þessa árás og þetta var mikið sjokk. [...] Núna finnst mér ótrúlega óþægilegt að vera ein og hræðist það mikið. Þær hafa komið til mín í vinnuna og sagt mér að falla frá kærunni. Þær hafa áreitt mig töluvert eftir þetta og þetta hefur tekið virkilega á mig.“

Að lokinni skýrslutöku beindi dómarinn orðum sínum að stúlkunni og sagði að ef hún yrði fyrir áreiti eftir skýrslutökuna skyldi hún snúa sér til lögreglu og lögmanns síns.

Segir vinkonu sína ekki hafa getað varið sig

Vinur stúlkunnar bar vitni á eftir henni. Hann lýsti því að hafa komið út af skemmtistaðnum og séð fullt af stelpum ráðast á vinkonu sína.

„Hún sat við húsið og gat ekkert varið sig. Það var sparkað og kýlt í hana. Ég labbaði bara að þessu og tók hana í burtu. Ég sá svo sem ekkert hvað gerðist nákvæmlega og sé ekki hver gerði hvað.“

Hann sagði að hann hefði farið með vinkonu sína burt og að hún hefði þá sagt honum að henni væri illt í andlitinu og eyranu. Þá hafi hún verið frekar dösuð eftir þetta allt saman en að hans mati hafi hún ekki verið dösuð vegna áfengisneyslu.

„Það voru um fjórar eða fimm stelpur sem stóðu við stelpuna þegar ég kom að þessu og þá dró ég hana í burtu.“



Aðalmeðferðin heldur áfram eftir hádegi.