Ekkert bendir til hryðjuverka

Ekkert bendir til þess að nítján ára gamall íranskur karlmaður sem fór með stolið vegabréf um borð í flugvél Malaysia Airlines, sem hefur verið saknað frá því á laugardag, tengist hryðjuverkahópum.

Maðurinn, Pouria Nour Mohammad Mehrdad, er talinn hafa ætlað að flytjast búferlum til Þýskalands þar sem móðir hans býr.

Enn bólar ekkert á vélinni en 239 voru um borð, þar af rúmlega 150 Kínverjar. Flugvélin var á leið frá Peking til Kúala Lúmpúr og hvarf af ratsjá á milli Malasíu og Víetnam. Veðrið var gott og ekkert neyðarkall barst frá vélinni.

Mehrdad er annar tveggja manna sem fóru um borð með stolið vegabréf en ekki er vitað hver hinn maðurinn er. Hann er þó talinn hafa ferðast með Mehrdad og einnig hafa ætlað að flytja til Evrópu.