Sigurganga Trail Blazers og Pacers heldur áfram

Tíu leikir voru leiknir í NBA körfuboltanum í Bandaríkjunum í nótt ber þar hæst að sigurganga Indiana Pacers og Portland Trail Blazers heldur áfram og LeBron James tryggði Miami Heat sigur á Orlando Magic.

LeBron James skoraði sigurkörfu Miami Heat þegar 15,1 sekúnda var eftir af leiknum gegn Orlando Magic í nótt en Miami hafði verið mest 16 stigum undir í seinni hálflleik. Heat vann leikinn 101-99 en það var Dwyane Wade sem var stigahæstur meistaranna í nótt.

Wade skoraði 27 stig og James 22 en James tók auk þess 9 fráköst og gaf 7 stoðsendingar. Glen Davis skoraði 20 stig af bekknum fyrir Magic.

Portland Trail Blazers vann 12. sigur sinn í 14 leikjum á leiktíðinni þegar liðið heimsótti Golden State Warriors í nótt. Trail Blazers hefur unnið sjö af átta útileikjum sínum og leikið frábærlega.

Trail Blazers var þremur stigum undir þegar fjórði leikhluti hófst en vann að lokum öruggan 12 stiga sigur 113-101.

LaMarcus Aldridge fór á kostum í leiknum fyrir Trail Blazers. Hann skoraði 30 stig og tók 21 frákast. Wesley Matthews skoraði 23 stig og Damian Lillard 20 en hann gaf auk þess 9 stoðsendingar.

Klay Thompson skoraði 30 stig fyrir Warriors sem hefur unnið 8 leiki og tapað 6. Stephen Curry skoraði 22 stig og gaf 11 stoðsendingar.

Inidana Pacers vann einnig 12. sigur sinn í nótt þegar liðið lagði Philadelphia 76ers 106-98. Pacers hefur aðeins tapað einum leik en liðið hefur unnið alla sjö heimaleiki sína.

Roy Hibbert skoraði 27 stig fyrir Pacers, tók 13 fráköst og varði 6 skot en allir byrjunarliðsleikmenn Pacers skoruðu 11 stig eða meira.

Michael Carter-Williams skoraði 29 stig fyrir 76ers og Evan Turner 21.



Úrslit næturinnar:

Los Angeles Clippers – Sacramento Kings 103-102

Indiana Pacers – Philadelphia 76ers 106-98

Washington Wizards – New York Knicks 98-89

Atlanta Hawks – Boston Celtics 87-94

Miami Heat – Orlando Magic 101-99

Houston Rockets – Minnesota Timberwolves 112-101

Milwaukee Bucks – Charlotte Bobcats 72-96

San Antonio Spurs – Cleveland Cavaliers 126-96

Denver Nuggets – Dallas Mavericks 102-100

Golden state Warriors – Portland Trail Blazers 101-113