Wade snýr aftur í kvöld

Dwyane Wade hefur misst af síðustu sex leikjum Miami Heat vegna hnémeiðsla en hann stefnir á að spila með liðinu í kvöld gegn Boston.

"Mér líður vel. Líkamlega hliðin er í betra standi en sú andlega. Ég spilaði meiddur í tvær vikur og á endanum gat ég ekki meir. Það var ekki skynsamlegt að halda áfram," sagði Wade.

Wade hefur einnig verið að glíma við meiðsli á ökkla en hnéð var að angra hann mun meira. Wade segir að hvíldin hafi séð til þess að hann sé kominn í lag.

Aðrir lykilmenn hafa einnig verið að glíma við meiðsli. LeBron James er ekki nógu góður og hefur misst af síðustu fjórum leikjum. Chris Bosh hefur misst af síðustu þremur.