Notaði skóinn sinn á ólöglegan hátt

Marc Gasol, miðherji Memphis Grizzlies í NBA-deildinni í körfubolta, deyr ekki ráðalaust þótt að hann missi annan skóinn sinn í miðjum leik. Spánverjinn stóri og stæðilegi komst þó ekki upp með að nota skóinn sinn í vörninni í leik á móti Utah Jazz á dögunum.

Gasol missti skóinn þegar hann var að hlaupa aftur í vörn eftir að hafa skorað og liðsfélagi hans kom síðan hlaupandi með hann til hans. Gasol hafði hinsvegar ekki tíma til að klæða sig aftur í skóinn og notaði hann síðan til að slá boltann úr höndum Derrick Favors, leikmanns Utah.

Gasol fékk á sig villu og þá gafst honum loksins tími til að klæða sig aftur í skóinn sinn. Atvikið gerðist í fjórða leikhluta þegar rúmar níu mínútur voru eftir af leiknum en Memphis tapaði þessum leik. Það er hægt að sjá þessu óvenjulegu tilburði Gasol hér fyrir neðan.