Forseti UFC: Gunnar þarf meira drápseðli

Dana White, forseti UFC-bardagasambandsins, ætlar að bíða með að láta Gunnar Nelson berjast við bestu kappana í sínum þyngdarflokki.

White sagði á blaðamannafundi eftir UFC-bardagakvöld á Wembley í Lundúnum um helgina að Gunnar hefði nægan tíma. Gunnar hafði betur gegn Jorge Santiago á stigum eftir þriggja lotu bardaga.

„Maður vill ekki fara sér óðslega með hann. Hann er ungur enn og nýbúinn að ganga í gegnum sinn fyrsta þriggja lotu bardaga í UFC. Hann á nægan tíma - ekkert nema tíma," sagði White.

Gunnar hefur nú tvívegis barist í UFC-bardagadeildinni sem er talin sú sterkasta í heimi. Alls hefur hann unnið ellefu af tólf bardögum sínum á atvinnumannaferlinum og er enn ósigraður.

„Það er áhugavert hversu óhefðbundinn hann er. Hann er með hendurnar niður við mjaðmirnar en samt mjög fljótur og höggþungur. Hann getur látið höggin dynja á manni úr alls kyns áttum."

„Ég er ánægður með að hann hafi barist allar þrjár loturnar. Hann hefur gott af reynslunni. Hann þarf líka meira drápseðli," sagði White.