Borgarbókasafnið skorar á meistara

Borgarbókasafnið setti í dag áskorun inn á Twitter síðu sína fyrir tilvonandi meistara sem hyggjast bæta lífstíl sinn í októbermánuði undir merkjum Meistaramánaðarins svonefnda. Meistaramánuður hefst nú 1. október og gengur út á að taka upp nýjar og betri lífsvenjur.

Áskorun Borgarbókasafnsins er einföld: Lesa bækur. Þetta er eitt af þeim markmiðum sem margir hafa sett sér í meistaramánuðinum síðustu ár, enda upplagt að nota tilefnið til að næra anda sinn líkt og líkama.

Fjölmargir hafa tekið þátt í meistaramánuði síðustu ár. Þátttakendur setja sér sjálfir markmið. Flestir láta af áfengisdrykkju, byrja að hreyfa sig meira og borða hollari mat. Margir ákveða einmitt að lesa bækurnar sem hafa legið á náttborðinu óhreyfðar síðustu mánuði. Nú hefur Borgarbókasafnið skorað opinberlega á meistarana að lesa þessar bækur. Spennandi verður að sjá hverjir verða við áskoruninni.