Íslenskur körfuboltamaður negldi samherja sinn niður

Stórskrýtið atvik átti sér stað í viðureign Augnabliks og Leiknis í 2. deild karla í körfuknattleik síðastliðið föstudagskvöld. Pirraður leikmaður Leiknis spyrnti þá knettinum af fullu afli í samherja sinn.

Um undanúrslitaviðureign í 2. deildinni var að ræða og var leikurinn, sem fram fór í Kórnum, í járnum. Jafnt var að loknum venjulegum leiktíma en Augnablik sigldi fram úr í framlengingunni.

Undir lok hennar reyndi Sigurður Gíslason þriggja stiga skot. Skotið geigaði og í baráttunni um frákastið tók Sigurður sig til og spyrnti í knöttin af fullu afli. Ekki vildi betur til en svo að liðsfélagi hans, Brynjar Smári Rúnarsson, stóð skammt undan og fékk knöttinn beint í kviðinn.

Líklegt má telja að Sigurður hafi verið í pirraðri kantinum enda gekk hann í burtu án þess að veita liðsfélaga sínum aðstoð sem lá eftir á gólfinu. Heimildir undirritaðs herma þó að Sigurður dauðsjái eftir sparkinu og Brynjar Smári hafi verið fljótur að jafna sig.

Myndatökumennirnir skemmtu sér konunglega yfir því sem fram fór.