Sonur sóknarþjálfara Green Bay drukknaði um helgina

Það er erfið stemning í herbúðum NFL-liðsins Green Bay Packers í dag þar sem að sonur sóknarþjálfara liðsins drukknaði um helgina. Sóknarþjálfarinn heitir Joe Philbin og hann er í Oshkosh í Wisconsin í dag þar sem sonur hans drukknaði.

Lögreglan fann lík af manni á aldrinum 20-25 um helgina. Það var sonur Philbin.

Sonurinn, sem var 21 árs, féll í gegnum ísinn á stórri á í Wisconsin og drukknaði. Neyðaróp heyrðust en ekki náðist að bjarga honum.

"Þetta eru erfiðir tímar fyrir Philbin-fjölskylduna. Okkar félag er eins og fjölskylda og við erum að reyna að styðja Joe og fjölskylduna eins og við getum," sagði Mike McCarthy, þjálfari Packers.

Green Bay á leik gegn NY Giants í úrslitakeppninni á sunnudag.