Greinilegt að hlaup hefur orðið

Enn hafa menn ekki orðið varir við hlaupið úr Skaftá í byggð. Flugmaður sem flaug yfir Vatnajökul í morgun segir greinilegt að hlaup hafi orðið í vestari katlinum. Veðurstofan segist alltaf hafa búist við því að hlaupið yrði lítið.

Samkvæmt upplýsingum Veðurstofunnar hefur rafleiðnin í vatninu heldur aukist en hitt, frá því í gærkvöldi, en á móti hefur heldur dregið úr gruggi. Vatnsrennslið sjáflt hefur ekki aukist umfram það sem gera má ráð fyrir vegna rigninga á svæðinu og hlaupóróa verður ekki vart. Vísindamenn telja að muni ekki valda tjóni, því hlaup varð úr báðum kötlunum í jöklinum í fyrarsumar, þannig að þar hefur ekki hlaðist upp mikið vatn síðan þá.

Almannavarnir vöruðu í gærmorgun við að Skaftárhlaup gæti verið að hefjast og var fólk varað við að vera við upptök árinnar og í lægðum við hana vegna hættulegra lofttegunda, og stendur sú viðvörun enn.