Hrafn: Maður er hundsvekktur eftir svona tap

„Ég er bara hundsvekktur eftir þetta tap,“ sagði Hrafn Kristjánsson, þjálfari KR, eftir að lið hans hafði tapað fyrir Stjörnunni, 107-105,  í öðrum leik liðanna um Íslandsmeistaratitilinn.  Staðan í einvíginu er því 1-1 og liðin eigast aftur við á sunnudaginn í DHL-höllinni. „Ég er bara hundsvekktur eftir þetta tap,“ sagði Hrafn Kristjánsson, þjálfari KR, eftir að lið hans hafði tapað fyrir Stjörnunni, 107-105,  í öðrum leik liðanna um Íslandsmeistaratitilinn. Staðan í einvíginu er því 1-1 og liðin eigast aftur við á sunnudaginn í DHL-höllinni.



„Við erum bara sjálfum okkur verstir í þessum leik, við bökkum alltof mikið í byrjun leiks þegar þeir fara að taka á okkur sem er ekki boðlegt í svona einvígi,“ sagði Hrafn.



„Svo þegar leið á leikinn þá fannst mér við vera komnir með nokkuð góð  tök á leiknum og hefðum hreinlega átt að klára dæmið. Við spiluðum hreinlega lélega vörn í kvöld“.



KR-ingar vildu undir blálokin meina að nokkrum sekúndum hafi verið rænt af þeim, en þeir fengu tækifæri til að jafna leikinn en aðeins 0,2 sekúndur voru á klukkunni og því náðu þeir ekki skoti að körfunni.



„Ég hreinlega skil ekki hvernig þeir fundu það út að eins 0,2 sekúndur væru eftir af leiknum, en ég á eftir að sjá þetta í sjónvarpinu aftur og þá mun ég sjá atvikið betur,“ sagði Hrafn.