NBA: New York Knicks endaði 13 leikja sigurgöngu Dallas

New York Knicks vann 128-94 sigur á Dallas Mavericks í NBA-deildinni í körfubolta í nótt og endaði með því þrettán leikja sigurgöngu Dallas-liðsins. Dallas var á heimavelli og hafði unnið New York með 50 stiga mun fyrr á tímabilinu.

Bill Walker skoraði 23 stig og Wilson Chandler var með 22 stig fyrir New York sem hafði tapað 9 leikjum í röð í Dallas. Dirk Nowitzki var með 20 stig og 12 fráköst fyrir Dallas í fyrsta tapi liðsins síðan 16. febrúar.

Dwight Howard var með 28 stig og 15 fráköst þegar Orlando Magic vann sinn áttunda leik í röð. Þetta er lengsta sigurganga Orlando síðan í apríl 2006.

George Hill var með 14 stig og 11 stoðsendingar þegar San Antonio Spurs vann 118-88 sigur á Los Angeles Clippers. Matt Bonner hitti úr 8 af 9 skotum sínum og skoraði 21 stig og Richard Jefferson var með 18 stig og 9 fráköst fyri Spurs sem er búið að vinna 6 af síðustu 7 leikjum sínum.

Luis Scola setti nýtt persónulegt met með því að skora 44 stig fyrir Houston Rockets semvann 116-108 sigur á New Jersey Nets. Argentínumaðurinn tók einnig 12 fráköst en hann hitti úr 20 af 25 skotum sínum í leiknum.

Nýliðinn Stephen Curry var með 35 stig og 10 stoðsendingar þegar Golden State Warriors vann 124-112 sigur á Toronto Raptors. Félagi Curry í bakvarðarsveit Warriors, Monta Ellis, skoraði 31 stig í sínum öðrum leik sínum eftir bakmeiðsli. Jose Calderon var með 24 stig og 12 stoðsendingar fyrir Toronto sem tapaði sínum fjórða leik í röð og í áttunda sinn í síðustu 9 leikjum.

J.R. Smith var með 19 af 30 stigum sínum í seinni hálfleik þegar Denver Nuggets vann 125-108 sigur á Memphis Grizzlies en Smith hitti úr 7 af 10 þriggja stiga skotum sínum í leiknum.

Joe Johnson skoraði 26 stig þegar Atlanta Hawks vann 112-99 sigur á Detroit Pistons.

Úrslit leikjanna í NBA-deildinni í nótt:

Atlanta Hawks-Detroit Pistons 112-99

Washington Wizards-Orlando Magic 95-109

Memphis Grizzlies-Denver Nuggets 108-125

Dallas Mavericks-New York Knicks 94-128

Houston Rockets-New Jersey Nets 116-108

San Antonio Spurs-Los Angeles Clippers 118-88

Golden State Warriors-Toronto Raptors 124-112