Marion Jones í WNBA

Hin fallna frjálsíþróttastjarna, Marion Jones, er ekki af baki dottin og hefur nú komist á samning hjá Tulsa Shock í WNBA-deildinni.

Hin 34 ára gamla Jones fékk að æfa með liðinu á dögunum og heillaði þjálfarann nógu mikið til þess að fá samning hjá félaginu.

„Við erum gríðarlega ánægð að fá hana. Hún sýndi á æfingum hversu mikið hún leggur á sig. Hún býr yfir ákveðnum hlutum sem ekki er hægt að kenna. Hún lítur vel út og ekki hægt að segja að aldurinn segi allt um hana," sagði Nolan Richardson, þjálfari liðsins.

Jones spilaði háskólakörfubolta með North Carolina á sínum tíma. Þar var hún aðalleikstjórnandi liðsins sem vann háskólaboltann árið 1994.

Jones var sleppt úr fangelsi í september 2008 en þangað fór hún fyrir notkun ólöglegra lyfja sem og hafa tekið þátt í kreditkortasvikamyllu.

Hún vann til fjögurra verðlauna á ÓL í Sydney árið 2000 en missti verðlaunin er hún játaði notkun ólöglegra lyfja nokkrum árum síðar.

Þess má síðan geta að hún eignaðist barn fyrir aðeins átta mánuðum síðan.