Fisher áfram hjá Lakers en Farmar er farinn

Bakvörðurinn magnaði, Derek Fisher, verður áfram í herbúðum LA Lakers á næstu leiktíð. Fisher sendi frá sér yfirlýsingu í gær þar sem hann sagðist ætla að semja upp á nýtt við Lakers.

Fisher hefur unnið fimm NBA-titla á ferlinum og var með nokkur tilboð í pokanum. Hann ræddi meðal annars við Miami Heat.

Hann ákvað samt á endanum að vera áfram hjá félaginu sem hann hefur spilað með í 11 ár á 14 ára ferli.

Fisher byrjaði alla 82 leiki Lakers síðasta vetur. Hann skoraði 7,5 stig að meðaltali í leik og gaf 2,5 stoðsendingar.

Hann bætti sig síðan í úrslitakeppninni þar sem hann var með rúmlega 10 stig í leik.

Lakers hefur aftur á móti misst Jordan Farmar til New Jersey en er í staðinn búið að semja við Steve Blake.