Icebank gerði kröfu um greiða gegn greiða og FME rannsakar

Icebank keypti fjárfestingarfélagið Teig af Runólfi Ágústssyni á annað hundrað milljónir króna gegn því skilyrði að hann notaði söluandvirðið til að fjárfesta í Icebank. Fjármálaeftirlitið er að rannsaka heildarviðskipti með hlutabréf í bankanum nokkur ár aftur í tímann.

Runólfur Ágústsson, lögfræðingur sem sagði af sér embætti umboðsmanns skuldara eftir einn dag í embætti, hefur sagt í viðtölum að það hafi verið Sparisjóðabankin sem átti frumkvæði að því að bjóða honum að kaupa hlutabréf í bankanum árið 2007 sem þá starfaði undir heitinu Icebank.

Runólfur sagði í viðtali við Kastljós að hann hefði fengið 55 milljóna króna lán hjá Sparisjóði Mýrasýslu til að kaupa félag sem hann síðan seldi Icebank. Samkvæmt heimildum fréttastofu er þetta Fjárfestingarfélagið Teigur og var verðið sem Icebank greiddi á annað hundrað milljónir króna. Hið rétta er jafnframt að hann stofnaði sjálfur Fjárfestingarfélagið Teig og félagið var m.a fjármagnað á grundvelli lánsins frá Sparisjóði Mýrasýslu.

Samkvæmt sömu heimildum keypti Icebank fjárfestingarfélagið Teig á þessu verði, á annað hundrað milljónir króna, af Runólfi gegn því skilyrði að söluandvirðið yrði notað til að fjárfesta í Icebank.

Það eigið fé sem Runólfur lagði inn í eignarhaldsfélagið Obduro ehf., alls hundrað milljónir króna, varð til vegna sölunnar á Teig til Icebank eftir að Runólfur hafði greitt niður lánið við Sparisjóð Mýrasýslu. Fréttastofa fékk þetta staðfest í dag. Eftir söluna á Teig fékk Obduro samtals tvö hundruð milljóna króna lán hjá Byr, Sparisjóðnum í Keflavík og SPRON, sem allir voru að selja hluti sína í Icebank, sem Obduro nýtti síðan til að fjárfesta í hlutabréfum í Icebank og en félagið keyptin bréfin af sparisjóðunum þremur.

Gunnar Þ. Andersen, forstjóri FME, er í fríi í Nevada-fylki Bandaríkjunum þar sem hann er í hestaferð. „Fjármálaeftirlitið er að skoða Sparisjóðabankann, eins og allar þessar föllnu einingar," sagði Gunnar í samtali við fréttastofu. Aðspurður hvort komið hefðu í ljós tilvik þar sem grunur léki á um markaðsmisnotkun vegna lánveitinga Sparisjóðabankans eða viðskipta með hlutabréf hans sagðist hann ekki geta staðfest það, en sagði að eftirlitið væri að skoða heildarviðskipti með hlutabréf í Sparisjóðabankanum nokkur ár aftur í tímann.