Shaq ánægður í Cleveland: Skemmtilegsta liðið sem ég hef verið í

Shaquille O'Neal er að finna sig vel í skugga LeBron James hjá Cleveland Cavaliers í NBA-deildinni í körfubolta. Miðherjinn með stóra skrokkinn og stóra brosið gæti verið á leiðinni að vinna NBA-titilinn með sínu þriðja liði ef Cleveland heldur áfram að spila jafnvel og liðið hefur gert að undanförnu.

„Þetta er fyndnasta og skemmtilegasta liðið sem ég hef verið í á mínum ferli. Þetta er frábær og samheldinni hópur," segir Shaquille O'Neal.

Cleveland er búið að vinna þrettán leiki í röð og er með besta árangurinn í allri NBA-deildinni - 43 sigra og aðeins 11 töp. Shaquille O'Neal hefur skorað 11,5 stig og tekið 6,6 fráköst á 23,0 mínútum með liðinu í vetur. Aðallmaður liðsins er og verður LeBron James.

„Þetta er hans sýning og ég er bara að reyna að hjálpa honum að líta vel út. Ef við værum á sama aldri þá væri kannski rafmagnaðra andrúmsloft en ég er á leiðinni út úr deildinni," sagði O'Neal í léttum tón.

„Ég er hér til þjónustu reiðubúinn, James kóngur," bætti hann við en það fylgir sögunni að uppáhaldsleikmaður allra þriggja sona hans er ... að sjálfsögðu LeBron James.