Íslenskt lið með á Evrópumeistaramótinu í áströlskum fótbolta

Íslenska landsliðið í áströlskum fótbolta tekur um næstu helgi þátt í sínu fyrsta evrópumeistaramóti í íþróttinni í Danmörku og Svíþjóð. Mótið stendur yfir dagana 1.-7. ágúst og mun íslenska liðið leika í riðli með heimamönnum Danmörk, Finnlandi og Englandi.

Sextán leikmenn eru inná í hvoru liði og leiknar eru 4x15 mínútur. Þótt íslenska liðið sé ungt og fremur óreynt, eru innan liðsins sterkir leikmenn sem hafa mikla reynslu af íþróttinni erlendis, s.s. í Danmörku og Frakklandi. Fyrirliði liðsins, Friðgeir Torfi Ásgeirsson, er því bjartsýnn á góðan árangur á mótinu:

"Liðið er vel undirbúið og mikill hugur í leikmönnum. Nýju strákarnir hafa náð betri tökum á íþróttinni en nokkur þorði að vona og allir reynsluboltarnir eru með utan Brynjars Ragnarssonar (atvinnumann hjá Cronulla Sharks í Sydney) sem meiddist á hné og er úti í 2-3 mánuði," sagði Friðgeir Torfi Ásgeirsson í fréttatilkynningu.

Íslenska liðið er lang "yngsta" liðið á mótinu enda hefur áströlsk knattspyrna einungis verið stunduð hér á landi í rétt rúmlega ár. Af þeim sökum hefur þátttaka liðsins vakið ómælda athygli sérstaklega eftir mjög sterka innkomu á Evrópubikarmótið í Króatíu (http://www.ec2010.info/participants/icelandic-ravens) sem fram fór 2009.

Ástralskur fótbolti, sem hefur fengið nafnið andspyrna, er nýleg íþrótt hér á landi, en í örum vexti. Þrjú lið eru nú hér á landi, sem keppa í Íslandsmóti í fyrsta skipti nú í sumar.Hægt er að fylgjast má með framvindu mótsins á síðunni http://www.ec2010.info/