Kevin Durant yngsti stigakóngurinn

Kevin Durant hjá Oklahoma City Thunder skoraði 31 stig í nótt þegar lið hans lagði Memphis. Hann endaði því sem stigakóngur NBA-deildarinnar þetta tímabilið.

Durant er 21. árs og er yngsti stigakóngur frá upphafi. „Það er góð tilfinning að vera hluti af sögunni. Ég get ekki sagt að ég hafi stefnt á þetta en ég mun aldrei gleyma þessu," sagði Durant.

Ljóst var að Durant myndi hirða þetta met þegar Cleveland ákvað að hvíla LeBron James í lokaleikjunum. Durant skoraði 30,1 stig að meðaltali í leik en LeBron 29,7.

Fyrra metið átti Max Zaslofskis sem var 22 ára þegar hann vann varð stigameistari 1947-48 fyrir Chicago Stags.

„Ég elska Kevin Durant og það sem hann stendur fyrir," sagði Scott Brooks, þjálfari Oklahoma. „Þessi maður er ótrúlegur. Hann býr yfir svakalegri yfirvegun þrátt fyrir ungan aldur."