Pakistanar á Íslandi kalla eftir aðstoð

Pakistanar hér á landi kalla eftir aðstoð vegna flóðanna í landinu. Þau færi samfélagið áratugi aftur í tímann og mikið fé þurfi til endurbyggingar. Sameinuðu þjóðirnar ítreka ákall sitt til þjóða heims um aðstoð.

Þeir Sheikh Aamir Uz-Zaman og Amjad Shakoor, sem báðir eru múslimar, eru í hópi um 50 Pakistana sem búa hér á landi. Þeir hafa miklar áhyggjur af ástandinu heima fyrir, en þar glímir fólk við verstu flóð sem þar hafa orðið á sögulegum tíma.

„Fólk er heimilislaust. Heimili margra eru í rúst. Við reynum að hjálpa þeim. Það taka allir höndum saman, múslimar, hindúar og kristnir, " segir Sheikh.

Um tuttugu milljónir manna hafa orðið fyrir barðinu á flóðunum, þúsundir farist og fjölmargir heimilislausir. Óttast er að farsóttir brjótist út.

Pakistanar hérlendis standa fyrir söfnun til aðstoðar þeim sem glíma við erfiðleika vegna flóðanna. Númer reiknings er 0324-26-03605, kennitala: 010567-2119.