Umfjöllun: Jafntefli í toppslag Vals og Stjörnunnar

Valur og Stjarnan skildu jöfn, 2-2, í toppslag Pepsi-deildar kvenna á Vodafonevellinum í kvöld. Valsstúlkur fengu miklu fleiri marktækifæri í leiknum en Stjörnustúlkur börðust grimmilega og Sandra Sigurðardóttir markvörður Stjörnunnar fór hreinlega á kostum í markinu.

Stjarnan komst yfir á 34. mínútu, nokkuð gegn gangi leiksins, en undirbúningur marksins var einkar glæsilegur. Stjörnustúlkan Björk Gunnarsdóttir lék á hvern varnarmanninn á fætur öðrum og gaf svo á Soffíu Arnþrúði Gunnarsdóttur sem skoraði með skoti frá vítateignum sem hafði viðkomu í varnarmanni Vals. Staðan var 0-1 fyrir Stjörnuna á hálfleik.

Valur byrjaði hins vegar með látum í seinni hálfleik og strax á 50. mínútu jafnaði Kristín Ýr Bjarnadóttir leikinn fyrir Val. Stuttu síðar tóku Valsstúlkur svo forystu í leiknum þegar Rakel Logadóttir skoraði með föstu skoti eftir sendingu frá Hallberu Guðnýju Gísladóttur.

Mikil harka færðist í leikinn á lokakaflanum og fljúgandi tæklingar út um allan völl, enda toppsætið í húfi. Valsstúlkur fengu sem fyrr beittari færi en það voru Stjörnustúlkur sem skoruðu.

Aðdragandi marksins var umdeildur en Sigurhjörtur Snorrason dómari leiksins dæmdi þá vítaspyrnu að því er virtist fyrir bakhrindingu á Aniku Laufeyju Baldursdóttur í vítateig Vals en mikil þvaga myndaðist í teignum og erfitt var að sjá hvað gerðist. Leikmenn Vals vildu hins vegar fá hendi dæmda á Aniku Laufeyju en hún handlék boltann greinilega eftir að meint brot hafði átt sér stað. Upphaflega dóminum var þó ekki haggað og Ásgerður Stefanía Baldursdóttir brá sér á vítapunktinn en María Björg varði skot hennar. Ásgerður Stefanía hirti hins vegar frákastið og skoraði þá af miklu öryggi.

Mark Ásgerðar Stefaníu reyndist lokamark leiksins og Stjörnustúlkur eðlilega sáttar í leikslok, með að hafa fengið stigið, en Valsstúlkur voru sárar og svekktar.

Liðin eru nú efst og jöfn á toppi deildarinnar með sextán stig, ásamt Breiðabliki, en Valur er með besta markahlutfallið af liðunum þremur.

Valur - Stjarnan 2-2

0-1 Soffía Arnþrúður Gunnarsdóttir (34.)

1-1 Kristín Ýr Bjarnadóttir (50.)

2-1 Rakel Logadóttir (57.)

2-2 Ásgerður Stefanía Baldursdóttir (86.)

Vodafonevöllurinn. Áhorfendur: Óuppgefið.

Dómari: Sigurhjörtur Snorrason

Skot (á mark):15-9 (6-4)

Varin skot: Sandra 4 - María Björg 2

Horn: 8-5

Aukaspyrnur fengnar: 17-14

Rangstöður: 8-0

Valur (4-4-2):

María Björg Ágústsdóttir

Sif Atladóttir

Pála Marie Einarsdóttir

Embla Sigríður Grétarsdóttir

Thelma Björk Einarsdóttir

Rakel Logadóttir

Katrín Jónsdóttir

Helga Sjöfn Jóhannesdóttir

Hallbera Guðný Gísladóttir

(90., Andrea Ýr Gústavsdóttir)

Kristín Ýr Bjarnadóttir

(74., Dagný Brynjarsdóttir)

Dóra María Lárusdóttir

Stjarnan (4-5-1):

Sandra Sigurðardóttir

Guðríður Hannesdóttir

Eyrún Guðmundsdóttir

Anna Björk Kristjánsdóttir

Kristrún Kristjánsdóttir

Inga Birna Friðjónsdóttir

(45., Helga Franklínsdóttir)

Gunnhildur Yrsa Jónsdóttir

ÁSgerður Stefanía Baldursdóttir

Soffía Arnþrúður Gunnarsdóttir

(82., Anika Laufey Baldursdóttir)

Edda María Birgisdóttir

Björk Gunnarsdóttir

(73., Karen Sturludóttir)