Sport

Lauf­ey Lín hjálpaði Alysu Liu að vinna gullið

Óskar Ófeigur Jónsson skrifar
Alysa Liu fagnar hér sigri sínum með Ólympíugullið um hálsinn og bandaríska fánann yfir öxlunum. 
Alysa Liu fagnar hér sigri sínum með Ólympíugullið um hálsinn og bandaríska fánann yfir öxlunum.  Getty/Jamie Squire

Alysa Liu varð í kvöld Ólympíumeistari í listdansi á skautum og batt þar með enda á tuttugu ára verðlaunaþurrð bandarískra kvenna í þessari grein. Hún varð líka fyrsta bandaríska konan til að vinna Ólympíugull á listskautum í 24 ár.

Eftir æsispennandi keppniskvöld og frábæra keppni skautaði enginn betur en Liu sem hafði verið í þriðja sæti eftir stutta prógrammið. 

Laufey Lín Jónsdóttir hjálpaði Alysu Liu að vinna gullið því sú bandaríska dansaði eftir lagi íslensku tónlistarkonunnar í stutta prógramminu en í kvöld notaði hún lag Donnu Summer.

Sarah Hughes vann gull árið 2002 en hún var síðasti bandaríski Ólympíumeistarinn í kvennaflokki. Sasha Cohen vann silfur árið 2006 og það var síðasti bandaríski verðlaunahafinn.

Liu, sem virtist ekki trúa sínum eigin augum þegar lokastigin voru tilkynnt. Hin japanska Kaori Sakamoto hlaut silfurverðlaunin og Ami Nakai, einnig frá Japan, tók heim bronsið. Bandaríkin og Japan drottnuðu yfir efstu fimm sætunum.

Önnur bandarísk kona, Amber Glenn, olli miklum vonbrigðum með þrettánda sæti eftir stutta prógrammið en skilaði frábæru frjálsu prógrammi og endaði að lokum í fimmta sæti.

Sextán ára gömul náði Alysa Liu sjötta sæti í Peking fyrir fjórum árum. Hún hætti eftir það en eftir tveggja ára hlé ákvað hún að snúa aftur. Liu er ánægð með það núna.

Liu bætist í hóp goðsagnakenndra bandarískra kvenna sem hafa unnið Ólympíugull í listskautum – Tara Lipinski (1998), Kristi Yamaguchi (1992), Dorothy Hamill (1976) og Peggy Fleming (1968) svo nokkrar séu nefndar.




Fleiri fréttir

Sjá meira


×