AGS íhugar útgáfu skuldabréfa í fyrsta sinn

Alþjóðagjaldeyrissjóðurinn (AGS) íhuga nú skuldabréfaútgáfu í fyrsta sinn í sögu sinni. Eru hugmyndir þessar tilkomnar vegna mikillar ásóknar í aðstoð frá sjóðnum í þeirri fjármálakreppu sem nú ríkir.

Í umfjöllun um málið í The Wall Street Journal segir að sjóðurinn vilji gjarnan auka lánagetu sína úr 250 milljörðum dollara og í 500 milljarða dollara eða um 60 þúsund milljarða kr.

AGS er nú að ganga frá 100 milljarða dollara láni frá Japan en þrátt fyrir að efnahagslægð hafi plagað Japani um langt skeið liggur landið á einum stærsta gjaldeyrisvaraforða í heimi.

John Lipsky aðstoðarforstjóri AGS segir ekki hættu á því að sjóðurinn verði uppiskroppa með lánsfé þrátt fyrir að hafa lofað mörgum löndum, þar á meðal Íslandi, aðstoð sem í heild nemur nú 50 milljörðum dollara.

Reikna má með að þau ríki sem borga hvað mest til AGS muni verða mótfallin hugmyndum sjóðsstjórnarinnar um skuldabréfaútgáfu því slíkt mynid gera sjóðinn um of óháðan þeim.