For­svars­menn Claude láku ó­vart sínum eigin frumkóða

Tæknimiðillinn VentureBeat greinir frá þessu en Anthropic staðfestir þar að innri frumkóði forritunartólsins Claude Code, sem keyrir í útstöð (e. terminal), hafi óvart orðið aðgengilegur almenningi.

„Engin viðkvæm gögn um viðskiptavini eða reikningsupplýsingar voru undir eða gerð opinber,“ skrifar Anthropic í yfirlýsingu til VentureBeat. „Um er að ræða útgáfu sem er af völdum mannlegra mistaka, en ekki öryggisbrests.“ Unnið sé að verkferlum til að koma í veg fyrir að þetta gerist ekki aftur.

Nánar tiltekið var tæplega sextíu megabita map-skjali óvart hlaðið upp ásamt uppfærslu af pakkanum „@anthropic-ai/claude-code“ inni á NPM, sem er vettvangur þar sem forritarar deila kóðum sín á milli.

Netverjar höfðu þegar hlaðið niður skjölunum og endurbirt á GitHub áður en Anthropic fjarlægði svo skjalið í nýrri uppfærslu.

Þessi leki hefur fært almenningi og keppinautum Anthropic dýrmætar upplýsingar á silfurfati sem snúa að því hvernig mállíkanið virkar á bak við tjöldin.

Meðal þess má finna lausn Anthropic við svokallaðri „samhengisóreiðu“ (e. context entropy), en það nefnist sú tilhneiging mállíkana að ruglast í ríminu og jafnvel bulla, einkum þegar samtöl eru orðin löng. Lausn Anthropic gengur út á svokallað þriggja laga minniskerfi.

Þá má einnig finna skrár er varða tæknilausnir sem hafa enn ekki verið útgefnar, svo sem KAIROS sem gengur út á að Claude keyri ávallt í bakgrunni og fylgist með því sem notandi slær inn í útstöðina, svo að Claude sé ávallt upplýstur um samhengi þess sem spurt er um.