Húsfyllir á tískusýningu

Fatahönnuðurinn Mundi sýndi nýja línu sína í Hafnarhúsinu á fimmtudagskvöld. Öll módelin voru krakkar með Downs-heilkenni.

„Ég held að það hafi mætt um 500 manns og ekki allir komist að sem vildu,“ segir Sigyn Eiríksdóttur um tískusýningu á nýjustu línu Munda sem fram fór í Listasafni Reykjavíkur á fimmtudagskvöldið. Sigyn, sem er móðir Munda og framkvæmdastjóri hönnunarfyrirtækisins, segir sýninguna hafa heppnast vel og viðbrögðin hafa verið mjög góð.

„Ein sem var að stílisera fyrir okkur þekkir konu sem á dreng með Downs-heilkenni. Þegar Mundi stakk upp á því að hafa módel sem eru með Downs-heilkenni hafði hún samband við móður drengsins sem var rosalega spennt fyrir þessu og kom okkur í samband við hin módelin,“ útskýrir Sigyn, en um tíu manns sýndu fatnað Munda. „Það voru krakkar þarna innan um sem eru frábær módel. Það eina sem þau voru beðin um að gera var að stoppa fyrir framan ljósmyndarana, annars kom allt sem þau gerðu frá þeim sjálfum,“ bætir hún við.

Sýningin er einn af viðburðum HönnunarMars sem Hönnunarmiðstöð Íslands heldur nú í fyrsta sinn, en nýjasta lína Munda er væntanleg í verslanir í haust. -ag