Iverson líst vel á að fara til Miami Heat

Bakvörðurinn Allen Iverson er að leita sér að nýju félagi eftir stutt stopp hjá Detroit Pistons en leikmaðurinn er fáanlegur á frjálsri sölu.

Iverson líst alls ekki illa á að fara til Miami Heat en stórstjarnan Dwyane Wade hvatti forráðamenn Heat að fá til sín stærri nöfn við fyrsta tækifæri til þess að styrkja leikmannahóp félagsins.

„Staðreyndin að Wade og Pat Riley séu til staðar gerir félagið að mjög ákjósanlegum möguleika í stöðunni. Ég vill koma inn í umhverfi þar sem ég get unnið eitthvað og verið ánægður og Heat gæti boðið upp á það," segir Iverson.

„Það eru einhver tilboð á borðinu en ekkert fast í hendi enn sem komið er. Það er það eina sem ég get sagt eins og staðan er núna," segir Leon Rose umboðsmaður leikmannsins.