Bynum gæti spilað gegn meisturunum

Phil Jackson, þjálfari LA Lakers, segir að til greina komi að miðherjinn ungi Andrew Bynum komi við sögu í stórleik liðsins gegn San Antonio á sunnudaginn.

Bynum lék afar vel með Lakers í vetur en hefur verið meiddur á hné síðan í janúar. Jackson segir koma til greina að gefa unga manninum nokkrar mínútur á sunnudaginn ef hann kemur vel út úr æfingum daginn áður.

"Það er möguleiki á að hann spili. Ef hann kemur vel út úr æfingu daginn áður og sannfærir mig um að hann sé klár. Við treystum samt ekki á það. Þetta er aðeins fjarlægur möguleiki í augnablikinu," sagði Jackson.

Leikurinn gegn meisturum San Antonio verður næstsíðasti deildarleikur Lakers í vetur en liðið klárar tímabilið heima gegn Sacramento á þriðjudaginn í næstu viku.