James setti met í tapi Cleveland

Hinn ótrúlegi LeBron James hjá Cleveland Cavaliers varð í nótt yngsti maðurinn í sögu NBA deildarinnar til að skora 10,000 stig á ferlinum þegar hann skoraði 26 stig í 92-87 tapi fyrir Boston Celtics. Ray Allen var stigahæstur hjá Boston í leiknum í nótt með 22 stig.

James er 23 ára og 59 daga gamall, en Kobe Bryant var 24 ára og 194 daga gamall þegar hann náði áfanganum og Tracy McGrady um 80 dögum eldri en það.

New Orleans lagði Phoenix á heimavelli 120-103 og rétti þar með úr kútnum eftir smá lægð að undanförnu. David West skoraði 27 stig fyrir New Orleans og Chris Paul skoraði 25 stig og gaf 15 stoðsendingar. Amare Stoudemire var atkvæðamestur hjá Phoenix með 32 stig og 14 fráköst.

Utah lagði Detroit 103-95 eftir að hafa verið undir allan fyrri hálfleikinn. Rip Hamilton skoraði 22 stig fyrir Detroit en Mehmet Okur var með 24 stig hjá Utah.

Atlanta lagði Sacramento 123-117 þar sem Mike Bibby hjá Atlanta átti fínan leik gegn sínum gömlu félögum og skoraði 24 stig og gaf 12 stoðsendingar. Joe Johnson skoraði 26 stig og Josh Childress 25 fyrir Atlanta. Beno Udrih og Brad Miller skoruðu 25 hvor fyrir Sacramento.

Chicago lagði Indiana 113-107 á útivelli. Larry Hughes skoraði 29 stig fyrir Chicago og Mike Dunleavy 25 fyrir Indiana.

Philadelphia vann góðan sigur á Orlando 101-89. Hedo Turkoglu skoraði 20 stig fyrir Orlando en þeir Willie Green og Andre Miller skoruðu 26 hvor fyrir Philadelphia.

Toronto lagði Minnesota 107-86. Al Jefferson skoraði 23 stig fyrir Minnesota en Chris Bosh 28 fyrir Toronto.

New York burstaði Charlotte 113-89 og var þetta stærsti sigur New York á tímabilinu. Nate Robinson skoraði 22 stig fyrir New York en Matt Carroll skoraði 19 fyrir Charlotte.

Denver rótburstaði Seattle á útivelli 138-96. Allen Iverson skoraði 31 stig fyrir Denver en Mickael Gelabale og Kevin Durant 16 hvor fyrir Seattle.

Loks vann Portland nauman útisigur á LA Clippers 82-80. Jarrett Jack 21 stig fyrir Portland en Corey Maggette 32 fyrir Clippers.