NBA í nótt: LeBron kláraði Boston

LeBron James sýndi mátt sinn og megin er hann leiddi lið sitt, Cleveland, til sigurs gegn meistaraefnunum í Boston, 114-113.

James skoraði 33 stig í leiknum, gaf tólf stoðsendingar og tók níu fráköst. Zydrunas Ilgauskas var einnig öflugur en hann var með 21 stig og tíu fráköst. Þá skoraði Larry Hughes átján stig og gaf sex stoðsendingar.

Boston var með tveggja stiga forystu í hálfleik, 66-64, en ekkert lið hafði skorað svo mörg stig í fyrri hálfleik gegn Cleveland allt tímabilið.

Cleveland var með tveggja stiga forystu þegar tæp mínúta var til leiksloka og Boston var með boltann. Þá lét Rajon Rondo hins vegar Daniel Gibson stela boltanum af sér og í kjölfarið fékk Ilgauskas tvö vítaskot sem hann nýtti bæði.

Þar með var munurinn orðinn fjögur stig og aðeins fimmtán sekúndur til leiksloka. James Posey skoraði úr þriggja stiga skoti í blálokin en nær komst Boston ekki.

Ray Allen var stigahæstur hjá Boston með 24 stig en Rondo gerði 20 stig í leiknum.

LA Lakers vann fimmtán stiga sigur á New Jersey, 105-90. Pau Gasol lék sinn fyrsta leik með Lakers eftir að hann kom þangað frá Memphis í síðustu viku og átti gríðarlega góðan leik. Hann skoraði 24 stig og tók tólf fráköst.

Enginn hefur skorað meira í sínum fyrsta leik með Lakers síðan að Magic Johnson skoraði 26 í fyrsta leik sínum árið 1979.

Kobe Bryant skoraði minna en tíu stig í leik í meira en ár en hann skoraði sex stig. Reyndar verður að koma einnig fram að síðustu þrjá leikhluta leiksins var litli fingur hans á hægri hendi farinn úr lið.

Derek Fisher var þó stigahæsti leikmaður Lakers með 28 stig en stigahæstur hjá New Jersey var Vince Carter sem skoraði 27 stig.

San Antonio vann stóran sigur á Indiana, 116-89, í nótt en Tim Duncan skoraði nítján stig og tók fimmtán fráköst í leiknum. Þetta var sjöundi tapleikur Indiana í röð.

Philadelphia vann Washington þökk sé 17-0 spretti í fjórða leikhluta, 101-96.

Þá vann Milwaukee lið Memphis á útivelli, 102-97, en Mo Williams var með 32 stig og sjö stoðsendingar fyrir Milwaukee.

Staðan í deildinni